Dang‘ara tumani “Asia premium” fermer xo‘jaligi paxta maydonlarida g‘o‘za parvarishida zararkunanda va xashoratlarga qarshi kurashish bo‘yicha seminar bo‘lib o‘tdi. Seminarda tuman hokimi, Qishloq va suv xo‘jaligi masalalari bo‘yicha tuman hokimi o‘rinbosari, fermerlar kengashi vakillari, o‘simliklar karantini va himoyasi bo‘limi xodimlari, OVX mexanizatorlari ishtirok etdi. Seminar davomida g‘o‘za maydonlari hamda dala chetlariga zararkunanda va hashoratlarga qarshi biomahsulotlar, shuningdek kimyoviy preparatlar bilan profilaktik ishlov berish hamda suspenziya sepish kabi kechiktirib bo‘lmaydigan tadbirlar mutaxassislar tomonidan batafsil tushuntirildi. Fermer xo‘jaliklari ishchi-xodimlari, mexanizatorlar uchun munosib mehnat sharoitlari yaratish, dala shiyponlarida dam olish, yuvinish va ovqatlanish uchun sharoitlar yaratish bo‘yicha fermer xo‘jaliklari rahbarlariga alohida vazifalar yuklandi. G‘o‘za parvarishida qatnashayotgan OVX mexanizatorlar uchun dasturxon yozilib, 2 mln so‘m pul hamda oziq-ovqat mahsulotlari topshirildi.