Bugun Qoʻshtepa tuman hokimi Anvarjon Abdullayev rahbarligida tuman hokimligi katta majlislar zalida navbatdagi yigʻilish boʻlib oʻtdi. Yigʻilishda tuman prokurori, ichki ishlar boʻlimi boshligʻi, mahalla raislari, xotin-qizlar faollari, tumandagi barcha imom-xatiblar hamda jamoatchilik vakillari ishtirok etdilar. Kun tartibida quyidagi masalalar muhokama qilindi: Fargʻona viloyati hokimining “Oila-turmush doirasidagi jinoyatlarni barvaqt oldini olishga qaratilgan chora-tadbirlar mexanizmini tasdiqlash toʻgʻrisida”gi hamda Qoʻshtepa tuman hokimining 2025-yil 11-oktyabrdagi 299-11-157-Q/25-sonli qarori ijrosini taʼminlash yuzasidan amalga oshirilayotgan ishlar. “Toʻylar, oilaviy tantanalar, maʼraka va marosimlar oʻtkazilishini tartibga solish tizimini yanada takomillashtirishda davlat va jamoat tashkilotlarining roli” mavzusida fikr-mulohazalar bildirildi. Shuningdek, har bir mahallada tozalik oyligini oʻtkazish ishlarini samarali tashkil etish boʻyicha tegishli vazifalar belgilab olindi.