Mustaqilligimizning 34 yillik bayrami arafasida 1,551 mlyard mablag‘ hisobiga qurib bitkazilgan ochiq sport majmuasi foydalanishga topshirildi Qo‘shtepa tumanidagi mahallalarda infratuzilmani yaxshilash orqali aholining turmush farovonligini oshirish maqsadida bir qator ishlar amalga oshirilmoqda. Xususan, O‘zbekiston Respublikasi Prezidentining 2020 yil 25 noyabrdagi PQ-4898-sonli qaroriga asosan “Qishloq infratuzilmasini rivojlantirish loyihasi” dasturiga Istiqlol mahallasida Jahon taraqqiyot bankining 2,376 mlrd. so‘m mablag‘i hisobiga 7,450 km. ichki yo‘llar asfaltlandi. 1,618 mlyard mablag‘ evaziga esa 7 ta TP, 15 km sip kabel, 200 ta temir beton tayanchlar o‘rnatildi. Shuningdek, Mustaqilligimizning 34 yillik bayrami arafasida 1,551 mlyard mablag‘ hisobiga qurib bitkazilgan zamonaviy talablar darajasidagi ochiq sport majmuasi tantanali ravishda foydalanishga topshirildi. Tantanali marosimda tuman hokimining o‘rinbosari A.Yunusov va mas’ul idoralarning rahbarlari, mahalla hamda maktab jamoasi, shuningdek mahalla nuroniylari va yoshlar vakillari ishtirok etdilar. Marosimda so‘z olgan A.Yunusov va boshqalar yurtboshimiz rahnamoliklarida yoshlarga berilayotgan e’tibor, xususan, sport sohasida yaratilayotgan sharoitlarga to‘xtalib, bunga javoban qo‘shtepalik yoshlar orasidan ham jahon, olimpiada chempionlari yetishib chiqishiga ishonch bildirildi. Majmua zamonaviy standartlarga javob beradigan futbol, voleybol, basketbol maydonlari, yugurish yo‘lakchasi, yigit-qizlar uchun alohida kiyinish va yuvinish xonalari, shuningdek tomoshabinlar uchun qulay sharoitlar hamda boshqa zarur infratuzilmalarga ega. Tadbirda maktab o‘quvchilari tomonidan tayyorlangan konsert dasturi namoyish etildi. Ramziy lenta qirqilib, ishtirokchilar bu yerda sportchilar uchun yaratilgan sharoitlar bilan tanishdilar. Shuningdek tadbir davomida mahalla yoshlari ishtirokida futbol musobaqasi ham tashkil etildi. Xulosa o‘rnida shuni ta’kidlash joizki, mazkur sport maydoni 17-maktab xududida barpo etildi va uning qurilishi mahalla yoshlari uchun muhim qadam bo‘lib hisoblanadi.