Qo‘shtepa tumanidagi Madaniyat markazida Farg‘ona viloyati hokimligining tadbirkorlar bilan sayyor qabuli bo‘lib o‘tdi. Ushbu qabulda viloyat iqtisodiyot va moliya bosh boshqarmasi boshlig‘i o‘rinbosari I.Novikov, O‘zbekiston Respublikasi Prezidenti huzuridagi Biznes ombudsman devoni bosh inspektori M.Po‘latov hamda viloyatdagi mas’ul idoralarning rahbarlari hamda tuman hokimi A.Abdullayev ishtirok etdilar. Sayyor qabulda tumanning turli sohalarda faoliyat yuritayotgan tadbirkorlari o‘z loyihalari, amaliy muammolari va takliflari bilan ishtirok etishdi. Muloqot jarayonida tadbirkorlar yer ajratish, infratuzilma bilan ta’minlash, kredit olish, ruxsat berish hujjatlari va boshqa qator masalalar yuzasidan murojaat qilishdi. Qabul yakunida har bir murojaat bo‘yicha mas’ul idora va tashkilotlarga aniq vazifalar yuklatilib, ijrosi doimiy nazoratga olindi. Tadbirkorlar bunday ochiq muloqot va samarali yechimlar uchun minnatdorlik izhor etib, kelgusida tuman iqtisodiyotini rivojlantirishda faol ishtirok etishga tayyor ekanliklarini bildirishdi.