1. Bosh sahifa
2. Yangiliklar

YUKSAK ISHONCHGA MUNOSIB BO’LAYLIK

×

Zamonaviy  bilim  va  ko’nikmalarga  ega,  mamlakatning  munosib  kelajagi uchun  javobgarlikni  o’z  zimmasiga  ola  biladigan,  maqsadga  intiluvchan  va serg’ayrat barkamol yoshlarni tarbiyalash mamlakatni barqaror va ildam rivojlantirishning eng muhim shartidir. Shu bois, so’nggi bir necha yil davomida O’zbekistonning 10 million fuqarosi yoki mamlakat aholisining 31 foizini tashkil etuvchi yoshlarga bo’lgan e'tibor tobora ortib bormoqda. Ana shunday yangilanishlar zamirida biz, yoshlar uchun ham yangi bir davr boshlandi.

Har bir yoshning tayanchi va suyanchi bo’lish kabi muhim vazifani o’z zimmasiga olgan Yoshlar ittifoqining asosiy faoliyatiga kirgan yigit-qizlar manfaatlarini himoya qilish, ularni tadbirkorlikka keng jalb etish, ish bilan  ta'minlash,  kam  ta'minlangan  va  imkoniyati  cheklangan  oilalar farzandlarini ijtimoiy qo’llab-quvvatlash, yosh oilalarga imtiyozlar berilishiga erishish, oliy ta'lim muassasalariga qabul qilishning yangicha va samarali mexanizmlarini ishlab chiqish, kitobxon yoshlarni kashf etish hamda  ularni  rag’batlantirish borasida  samarali  loyihalar  tashkil etildi va izchil amalga oshirilmoqda.

Yigit-qizlarning  biznes  loyihalari  uchun  “Yoshlar  -  kelajagimiz!”  jamg’armasi  o’z  faoliyatini  boshladi.  Joylarda “Yoshlar mehnat guzari”, “Yosh tadbirkorlar” kovorking markazlari  foydalanishga  topshirildi.

Ta'kidlash  joizki,  tashkilotimizning  tuman  kengashi  faoliyatini  boshlagandan  so’ng  yoshlar bilan  bog’liq  eng  muhim  masalalarni  belgilab  olgan  holda muammolarga yechim topish yo’lidan bordi. Tumanimizda yoshlar bandligini ta'minlash, ularga munosib ish o’rinlarini yaratish hamda  ishsizlik  muammosini hal  etishga  qaratilgan yangi loyihalar, uzoqni  ko’zlab amalga oshirilgan  chora-tadbirlar  bugun  anchagina  sezilari,  ijobiy natijalar bermoqda.

Xususan,  joriy  yil  avvalida manzilli  reja  asosida  51 ta  mahalla  fuqarolar  yig’ini kesimida doimiy ish joyiga ega bo’lmagan  yoshlar  o’rtasida so’rovnoma o’tkazilib, 2820 nafar ishsiz yoshlar ro’yxatga olindi. “Ustoz-shogird” an'anasiga ko’ra, hunarmandchilik, kasanachilikka jalb etish, hududlarda mehnat yarmarkalari tashkil qilish bilan ish topa olmayotgan  yoshlarga ko’maklashish, “Har bir yoshga-bir gektar” loyihasi orqali  yoshlarni  fermerlarga biriktirish hamda dehqon xo’jaliklari va tomorqa yerlarida bandligini ta'minlash, “Yoshlar-kelajagimiz!” jamg’armasi va “Har bir  oila-tadbirkor” Davlat dasturlari doirasida ajratilgan imtiyozli kreditlar evaziga yangi  ish o’rinlari yaratish orqali joriy yilning shu davrigacha qariyb 2000 nafarga yaqin ishsiz yoshlar bandligi ta'minlandi.

Yoshlar ma'naviyatini yuksaltirish va ularning bo’sh vaqtini mazmunli tashkil etish dolzarb vazifa. Shu maqsadda Prezidentimiz tomonidan ilgari surilgan besh muhim tashabbus yoshlar siyosatidagi muhim islohotlardan.  Tumanda besh tashabbus yo’nalishlari bo’yicha umumiy qiymati 2 milliard 115 million so’m bo’lgan 11 ta loyiha ishga tushirildi. Jumladan, zamonaviy  “Yoshlar markazi” foydalanishga topshirildi.  Markazda yoshlarning xorijiy  tillarni puxta o’zlashtirishi, kompyuter texnologiyalari va internetdan samarali foydalanishini tashkil etish maqsadida kompyuter, ingliz hamda  rus tili to’garaklari faoliyati yo’lga qo’yildi. 135 turdagi ilmiy va badiiy adabiyotlar hamda 10 000 dona elektron kitoblar fondiga ega yoshlar kutubxonasi yosh kitobxonlar uchun xizmat ko’rsatmoqda.

Qayd etish joizki, besh muhim tashabbus yoshlarning musiqa, rassomlik, teatr va san'atning boshqa turlariga qiziqishini oshirish bilan  boshlangani  bejiz emas. Azaldan san'at inson qalbini go’zallikka oshufta etib kelgan. San'atga astoydil mehr  qo’ygan inson yomon yo’ldan yurmaydi. Shuning uchun ham yoshlarning qiziqishlaridan kelib chiqib 13 yo’nalish bo’yicha 60 ta  to’garak faoliyati yo’lga qo’yildi. Ayni vaqtda mazkur to’garaklarda 9049 nafar o’quvchi-yoshlar musiqa va san'at sirlarini puxta o’zlashtirmoqda.

Ikkinchi tashabbusni ilgari surishdan yoshlarni jismoniy chiniqtirish, sport bilan shug’ullanishlari uchun zarur sharoitlar yaratish maqsadi  ko’zlangan.

Mazkur yo’nalish doirasida 835 million so’m  mablag’ evaziga “Qumtepa”  mahalla fuqarolar yig’ini hududida sun'iy qoplamali yopiq sport inshooti  va sog’lomlashtirish markazi tashkil  etildi. Hozirda tumandagi mavjud 307 ta sport inshootida 941 ta to’garak faoliyati yo’lga qo’yilib, 11950 nafar  o’g’il-qiz uchun muntazam jismoniy tarbiya bilan shug’ullanish imkoniyati yaratildi.

Axborot texnologiyalar davrida ular bilan ishlashni yoshlikdan  o’rganish, yangi avlod dasturchilarini yaratishga qaratilgan tashabbusning  uchinchi yo’nalishida tumandagi 74  ta to’garaklarda  9684  nafar  yosh kompyuter  texnologiyalari  va internetdan  samarali foydalanmoqda.

Kelajak avlod ma'naviyatini yuksaltirish, ular o’rtasida kitobxonlikni keng targ’ib qilishga yo’naltirilgan to’rtinchi tashabbus  doirasida  tumanda kutubxonalar soni 12 taga oshirilib, ulardagi mavjud kitob fondi qariyb 50 ming donaga yetkazildi, 2 ta yangi “BOOKLAND”  xizmati joriy etildi. Bundan ko’zlangan maqsad esa bugun muntazam mutolaa bilan band bo’lgan 48 ming 700 nafar kitobxonlar sonini 58 ming 968 nafarga yetkazishdir.

Yoshlar - kelajak bunyodkori. Bu shior har bir  yigit-qizni shu aziz yurt,  shu muqaddas zaminning ertangi istiqboli uchun fidoyi bo’lishga da'vat etadi. Shu bilan  birga,  har birimizda  Vatan  ravnaqiga daxldorlik  hissini  oshiradi. Ayni chog’da, mazkur so’zlar zamirida  yoshlarga  bildirilgan yuksak  ishonch ham mujassamdir. Shubhasiz, bugun yangi-yangi tashabbuslar bilan chiqayotgan, barcha sohalarda ulkan yutuqlarga erishayotgan, o’z bilim va  mahorati bilan O’zbekiston nomini jahonga tanitayotgan yurtimiz yoshlari ana shu yuksak ishonchga munosib bo’lishga  astoydil  harakat  qiladilar. Zero, yurt taraqqiyotiga munosib hissa qo’shish - eng oliy baxt, buyuk kelajak bunyodkorlariga zarur imkoniyatlar yaratish esa - Vatan taraqqiyotiga qo’shilgan munosib hissadir.

Abdulqosim ABDUMALIKOV,

O’zbekiston Yoshlar ittifoqi tuman kengashi raisi.