Yuridik va jismoniy shaxslar tomonidan veb sayt orqali bo'lgan murojaatlar
Jami murojaatlar: 38Ishonch telefoni statistikasi
BILGANGA TOMORQA - QO‘SHIMCHA DAROMAD MANBAI
2024-04-06 10:31:50 280
Tomorqa daromad manbai ekanligi hech kimga sir emas. Bugungi kunda yil bo‘yi qishloq xo‘jalik ekinlaridan hosil yaratish imkoniyati paydo bo‘ldi. Albatta buning uchun issiqxonalar qurilsa kifoya.
Keyingi paytlarda Qo‘shtepa tumanida ham kundan-kunga issiqxonalar soni oshmoqda. Qurilgan issiqxonalarda mehnatkash tomorqachilar ziravor ko‘katlar, oziq-ovqat mahsulotlari, gul ko‘chatlari hatto tsitrus mevalarni parvarishlash bo‘yicha ham katta tajribaga ega bo‘lishayotir.
Shomirzalik Mirzayevlarni mahalladagi namunali tomorqachilardan biri desak mubolag‘a bo‘lmaydi. Jaxongir Mirzayev ota-onasidan ko‘chatchilik sir-asrorini o‘rgandi. Oilali bo‘lib, o‘z xonadonida ham ko‘chat yetishtirishni yo‘lga qo‘ydi. Mahalladagi hokim yordamchisining tavsiyasiga ko‘ra ikki yil oldin 19 million so‘m imtiyozli kredit olib 2,5 sotixlik issiqxona qurdi. Mana, ikki yildirki issiqxonasida hamda tomorqasining qolgan qismidagi maxsus moslangan yerda pomidor, qalampir, baqlajon, karam ko‘chatlarini parvarishlab, qo‘shimcha daromad topmoqda.
– Har bir qarich hosildor yerni qadrlashimiz kerak, – deydi Jaxongir Mirzayev. – Ko‘chatchilik bilan oilaviy shug‘ullanamiz. Ota uyimizdagi 12 sotix tomorqada ham har yili ko‘chat yetishtiriladi. Ayni kunlarda ko‘chatlarni mahalladoshlarimizga, qolaversa ichki bozorga olib chiqib sotib, mehnatimizni samarasini ko‘rayapmiz.
Bir so‘z bilan aytganda, bu xonadonning barcha a’zolari yerga mehr berib mehnat qilishadi. Ushbu mehnatkash oilaning inoqligi va ro‘zg‘oridagi qut-barakasi bilan hamqishloqlariga ibrat bo‘lmoqda. Ularning mehnatsevarligi ertangi kunga ishonchidan dalolatdir.
