Yuridik va jismoniy shaxslar tomonidan veb sayt orqali bo'lgan murojaatlar
Jami murojaatlar: 38Ishonch telefoni statistikasi
ER BILAN TILLASHGAN KAM BO‘LMAYDI: TOMORQADAN 70 MILLION SO‘M SOF FOYDA
2024-04-02 08:59:01 203
Qo‘shtepa tumanidagi Sarmozor mahalla fuqarolar yig‘inida yashovchi
Yusubxon Marupovlar oilasi 2007 yildan buyon gulchilik bilan shug‘ullanib keladi. Oilaning asosiy daromad manbai gulchilik hisoblanib, gul, gul ko‘chatlari yetishtirish bo‘yicha o‘ziga xos tajriba maktabini yaratgan.
Marupovlar shaxsiy tomorqasining har bir qarich yeridan samarali foydalanadi. 2008 yilda 5 sotix yer maydonida issiqxona tashkil etilib, 50 turdagi gul ko‘chatlari yetishtirilgan bo‘lsa, hozirda mazkur issiqxonada 150 turdagi 20 mingdan ziyod gul ko‘chatlari parvarishlanmoqda. Gullar asosan urug‘idan hamda qalamchasidan ko‘paytiriladi.
Oila boshlig‘i Yusubxon Marupov gulchilikning nozik sir-asroridan yaxshigina xabardor. Shuning uchun ham gul o‘stirish uchun maxsus gumus tuproqni gulchining o‘zi tayyorlaydi.
Xonadonda yetishtirilayotgan pitomiya, salviya, katarantus, shafran, vaginyar palma, kanar palma, georgina, gvozdika, shiflera, fikus (qora shaxzoda), gibiskus (xitoy atirguli), meyson begoniya, agava, geran, spatifillum (ayol baxti), xamedoreya kabi va boshqa turdagi gul ko‘chatlari respublikamizning turli viloyatlari shuningdek qo‘shni respublikalarga ham yetkazib berilmoqda.
Eng muhimi yilning to‘rt mavsumida tomorqadan samarali foydalanish evaziga, yildan yilga daromad ham ortib bormoqda. Xususan, 2023 yilda
70 million so‘m daromad olindi. Qolaversa mahalladagi 5 nafar ishsiz, mehnatga layoqatli xotin-qizlar ish bilan ta’minlangan.
Sarmozorlik har bir fuqaro Yusubxon Marupovning mirishkor dehqonligi-yu, mehnatsevarligi to‘g‘risida faxr bilan so‘zlashadi.
Yusubxon Marupovning mehnatsevarligi tufayli hovlidagi har qarich yer daromad manbaiga aylangan. Ayni paytda u tomorqachilik bobida boshqalarga ham ko‘mak berib keladi. Har yili ming tupgacha ko‘chatlarni bepul tarqatib, ekishda, parvarishlashda mahalladoshlariga beg‘araz yordam va maslahatlarini berib kelmoqda.
