1. Бош сахифа
2. Янгиликлар

Қўштепа туманида мукаммал таъмирланган яна бир мактаб биноси фойдаланишга топширилди

×

Қўштепа тумани “Шомирза” маҳалла фуқаролар йиғини ҳудудидаги 23-умумтаълим мактабининг мукаммал таъмирланган янги биноси фойдаланишга топширилди.

Шу муносабат билан ташкилланган тантанали маросимда сектор раҳбарлари, маҳалла фаоллари, соҳага алоқадор ташкилотлар вакиллари, ота-оналар, мактаб ўқитувчилари ва ўқувчилари иштирок этди.

Тадбир аввалида туман ҳокими Анваржон Абдуллаев сўз олиб, мактаб жамоаси ва маҳалла аҳлини янги бино фойдаланишга топширилиши билан самимий қутлади.

Мамлакатимизда таълим тизимига қаратилаётган эътибор, ёш авлодга сифатли таълим бериш ва тарбиялаш учун яратилаётган имконият ва қулайликлар ҳақида алоҳида тўхталиб ўтди.

Шундан сўнг, мактабда қурилиш ва таъмирлаш ишларини олиб борган қурувчиларга эсдалик совғалари топширилди.

Тантанада меҳмонлар томонидан ленталар қирқилгач, мактабнинг рамзий калити ўз эгаларига топширилди. Меҳмонлар таълим муассасасида яратилган шароитлар билан танишишди.

Таъкидланишича, мактабнинг асосий биноси 1975 йилда қурилган. Жорий йилда инвестиция дастури асосида ушбу таълим масканида мукаммал таъмирлаш, шунингдек 12х24 спорт зали қуриш ишлари амалга оширилди. Қурилиш-таъмирлаш ишларига 4 миллиард 369 миллион сўм маблағ сарфланди.

Натижада, ушбу мактаб тумандаги замонавий ва кўркам зиё масканларидан бирига айланди.

Эндиликда 500 нафардан зиёд ўқувчи-ёшлар янги очилган, барча қулайликларга эга замонавий таълим муассасасида таҳсил олади.