1. Бош сахифа
2. Янгиликлар

ҚЎШТЕПАЛИК ДЕПУТАТЛАР ЖАМОАСИ ВИЛОЯТДА БИРИНЧИ ЎРИННИ ЭГАЛЛАДИЛАР

×

Ўзбекистон Республикаси Олий Мажлис Сенати Кенгаши томонидан 2020 йил 30 декабрда қабул қилинган “Парламент ўйинлари спорт мусобақаларини ташкил этиш ва ўтказиш тўғрисида”ги қарорида спортни янада ривожлантириш, маҳаллий Кенгашлар депутатлари ўртасида мунтазам равишда спорт мусобақаларини ўтказиш белгиланган. Шундан келиб чиқиб, вилоятимизнинг барча туман-шаҳарларида маҳаллий Кенгаш депутатларидан иборат жамоалар ташкил этилган.

Фарғона шаҳридаги 1-БЎСМга қарашли “Само” универсал мажмуасида Парламент ўйинларида спортнинг футбол тури бўйича ўтказилган мусобақада Халқ депутатлари Қўштепа тумани Кенгаши депутатлари жамоаси фахрли биринчи ўринни эгаллаб, вилоятда биринчи ўрин соҳиби бўлдилар.

Шуни таъкидлаш жоизки, ҳудудий босқичлар ғолиблари якунда Республика Олий Мажлиси Сенати раиси кубоги учун беллашишади. Мусобақа турли дастур ва қарашларга эга депутатларнинг бир жамоа бўлиб ғолиблик учун курашишлари билан бирга, жисмоний тарбия ва оммавий спорт билан мунтазам шуғулланишлари ҳамда соғлом турмуш тарзи бўйича янада қатъий ҳаётий кўникмаларга эга бўлишлари учун ўзига хос имконият ҳамдир.

Спортнинг футбол тури бўйича вилоятимизда ғолиб бўлиб, Республика босқичига йўлланмани қўлга киритган Қўштепа тумани Кенгаши депутатлари жамоасини ушбу ғалабалари билан қутлаймиз ва келгуси мусобақада омад тилаймиз.

Бизни ижтимоий тармоқларда кузатинг
Facebook, Telegram