1. Бош сахифа
2. Янгиликлар

ТАДБИРКОР ХОТИН-ҚИЗЛАР САФИ КЕНГАЙМОҚДА

×

Қўштепа туманида тадбиркор, ҳунарманд ва касаначи хотин-қизлар, тадбиркорлик фаолияти билан шуғулланиш истагини билдирган аёллар ҳар томонлама қўллаб-қувватланиб, кун сайин уларнинг сафи тобора кенгайиб бормоқда. 

“Хумдон” маҳалласида яшовчи Сайёрахон Одилова тикувчиликка қизиқар эди. У тижорат банкидан ажратилган 16 миллион сўмлик имтиёзли кредит эвазига 3 та замонавий тикув машинаси харид қилди. Шу тариқа ўз юмушини енгиллатиб, аста-секин даромадини кўпайтира бошлади. Ёнига 5 нафар ишсиз маҳалладош аёлларни ҳам олиб, бугун чақалоқлардан тортиб ёши катта аёлу-эркаклар кийимларини тикяпти.

– “Ҳунарманд” уюшмасининг Қўштепа тумани бўлимга  аъзо бўлгач, фаолиятимда тубдан ўзгариш бўлди, – дейди Сайёрахон Одилова. – Ўзимни эски “қора” тикув машиналарим бор эди. Ҳозирда уларни ёнига янгиларини қўшдик. Қўшниларим билан бирга турли харидоргир кийим-кечаклар, келинлик ва аёллар либослари тикиб, бозорларга етказиб бермоқдамиз. Бундан ташқари аҳоли буюртмалари асосида ҳам тикувчилик маҳсулотлари тайёрлаяпмиз.

Ҳозирда Сайёрахон ва унинг шогирдлари буюртма асосида қишки иш кийими тикишаётган экан. Тикувчиликка қўли келиб қолган 5 та шогирд тикканига яраша маош ҳам олишиб, тайёрланаётган маҳсулотларнинг чиройи ва сифатли бўлишини таъминлашяпти.

Қўштепа тумани ҳокимлиги Ахборот хизмати.

Бизни ижтимоий тармоқларда кузатинг
Facebook, Telegram