1. Бош сахифа
2. Янгиликлар

ИМОМ-ХАТИБЛАР БИЛАН СУҲБАТ

×

Қўштепа туманидаги “Муборак” жоме масжидида туман бош имом-хатиби А.Ахмадалиев ҳамда Республика Маънавият ва маърифат маркази Қўштепа тумани бўлинмаси раҳбари Н.Отабековлар иштирокида давра суҳбати бўлиб ўтди. Унда туманимиздаги масжидларда фаолият олиб бораётган имом-хатиблар қатнашдилар.

Тадбирда туман бош имом-хатиби А.Ахмадалиев сўз олиб, бугунги кунда Муҳтарам юртбошимиз томонидан олиб борилаётган ислоҳотлар, юртимизда маънавий-маърифий ишларга, айниқса ёшлармизга берилаётган эътибор ва имкониятлар ҳақида гапириб ўтди.

– Бу йилги “Моҳи рамазон” ойи ҳам яқинлашиб келмоқда – дейди А.Ахмадалиев. – Бу ойда мусулмонларнинг хайру саховати, меҳр-муруввати ҳар қачонгидан кўра жўшиб, ҳимматлари юксалиб, шижоатлари тўлқинланиб кетади. Шунинг учун Рамазонда мўмин-мусулмонлар орасидаги меҳр-оқибат, аҳиллик, биродарлик, бағрикенглик туйғулари янада мустаҳкамланади. Бизлар ҳам “Моҳи рамазон” ойига тайёргарлик кўриб, энг аввало масжидларимизни тозалигига, намоз ўқиш жойларимизни покизалигига эътибор беришимиз керак.

Туман бош имом-хатиби рамазон ойига тайёргарлик кўришда юқоридаги жихатларга эътибор қаратилиши тўғрисида имом-хатибларга топшириқ ва кўрсатмалар бериб ўтди.

Шундан сўнг тадбирда иштирок этаётган Республика Маънавият ва маърифат маркази Қўштепа тумани бўлинмаси раҳбари Н.Отабеков сўз олиб юртимизда олиб борилаётган маънавий-маърифий ишларга алоҳида тўхталиб ўтди.

Шунингдек, имом-хатиблар билан бўлиб ўтган самимий суҳбат давомида келгусида амалга оширилиши лозим бўлган ишларни ҳамкорликда йўлга қўйиш ва янада кучайтириш юзасидан келишиб олинди.

Қўштепа тумани ҳокимлиги Ахборот хизмати.

Бизни ижтимоий тармоқларда кузатинг
Facebook, Telegram